Tarihin Annabi Iliyasu:
Tarihin Annabi Iliyasu yana daya daga cikin tarihin annabawa masu daraja a cikin Alkur’ani da hadisai. Annabi Iliyasu (A.S), wanda a Turance ake kiransa Elijah, yana daga cikin manyan annabawan Bani Isra’ila. Allah Ta’ala ya aiko shi domin ya shiryar da mutanensa daga cikin shirka da bautar gumaka zuwa ga bautar Allah shi kaɗai.
A cikin wannan takaitaccen tarihi, za mu bayar da tarihin Annabi Iliyasu, daga haihuwarsa, aikinsa, kalubalen da ya fuskanta, har zuwa irin darussan da muka koya daga rayuwarsa.
Danna domin karanta cikakken tarihin Annabi Iliyasu wanda ba blog post ba.👇
Karanta Cikakken Tarihin Annabi Iliyasu
Wanene Annabi Iliyasu?
Annabi Iliyasu (A.S) annabi ne daga cikin zuriyar Annabi Haruna (A.S), wato kanin Annabi Musa (A.S). A cikin Alkur’ani, Allah ya ambaci Annabi Iliyasu cikin girmamawa, kuma Allah ya tabbatar da cewa yana daga cikin bayinsa nagari.
Allah (SWT) yana cewa:
“Lalle ne Ilyas (Iliyasu) yana daga cikin Manzanni.” (Surah As-Saffat: 123)
Tarihin Annabi Iliyasu Da Ayyukansa
1. Zamansa a Bani Isra’ila
Tarihin Annabi Iliyasu ya bayyana cewa Allah ya aiko shi zuwa Bani Isra’ila a lokacin da suka karkace daga tafarkin gaskiya. Sun koma bautar wani gunki mai suna Ba’al. Wannan gunki na Ba’al ya zama abin bautawa da yawa a lokacin, kuma mutane sun bar bautar Allah dalilinsa.
Annabi Iliyasu ya dage wajen kira ga Allah, yana kokarin jawo hankalin mutanensa cewa su koma ga tafarkin Allah.
2. Gwabzawa da Masu Bautar Gumaka
Annabi Iliyasu yayi kira ga Bani Isra’ila da wa’azi zuwa ga Allah, amma sun bijire masa. Haka kuma yayi fada da shugabannin addininsu da suka mayar da bauta ga gumaka al’ada a cikin rayuwarsu.
Allah yana cewa: “Shin ba ku tsoron Allah? Ku bar bautar Ba’al kuma ku bauta ga Ubangijin Halittu?” (As-Saffat: 124-126)
Sai dai mutane sun ki yarda da shi, kuma suka ci gaba da sabawa Allah.
3. Kalubalen Daya Fuskanta
Allah ya saukar da bala’i a kan mutanen da suka ki yarda da Annabi Iliyasu. An ce yunwa da fari suka addabi kasar saboda saboda shirka da suke faman tafkawa. Amma duk da haka, Annabi Iliyasu bai fasa kira zuwa ga Allah ba.
4. Magaji Bayan Iliyasu
Bayan lokacin Annabi Iliyasu (A.S), Allah ya aiko Annabi Alyasa’u (A.S), wanda ya ci gaba da aikin wa’azi da gyara a cikin Bani Isra’ila. Annabi Alyasa’u ya kasance magajinsa a cikin tafarkin aikin Allah.
5. Irin Gwagwarmayar Annabi Iliyasu
Tarihin Annabi Iliyasu ya nuna yadda ya kasance mai tawakkali, jarumta, da tsayuwar tsayin daka wajen kira zuwa ga Allah, duk da cewar mutane da yawa sun ki yarda dashi.
Ambaton Annabi Iliyasu a Alkur’ani
Allah ya ambace shi cikin Alkur’ani a wurare daban-daban, daga cikinsu:
- (Surah An’am: 85) – “Ilyas (Iliyasu) yana daga cikin masu kyau.”
- (Surah Saffat: 123-132) – An yi bayani dalla-dalla game da aikinsa da wa’azinsa.
- (Surah Saffat: 130) – “Salamun ga Ilyas.”
Matsayinsa a Cikin Littattafan Musulunci
A cikin littattafan musulunci, musamman tafsiri da tarihin annabawa, tarihin Annabi Iliyasu ana daukarsa a matsayin abin koyi ga duk wani mai kira zuwa ga Allah. Anan ne malamai suka fi yin bayani a kan irin wahalhalun da ya sha, da kuma yadda ya tsaya tsayin daka kan gaskiya.
Darussan da Muka Koya Daga Tarihin Annabi Iliyasu
1. Tawakkali ga Allah
Annabi Iliyasu ya dogara ga Allah komai wahalar da ya fuskanta daga mutanen da suka ki gaskiya.
2. Jarumtar Kira zuwa Ga Gaskiya
Ya nuna cewa duk mai bin Allah dole ne ya kasance jarumi, domin ya fuskanci kalubale ba tareda tsoro ba.
3. Kada a Bi Yawancin Mutane
Tarihin Annabi Iliyasu ya nuna cewa kada mu yarda mu bi mutane kawai saboda yawansu. Da yawa suna iya zama a kan kuskure, kamar yadda Bani Isra’ila suka bijire ga Allah.
4. Ladabin Annabawa
Annabi Iliyasu yana daga cikin annabawan da suka fi kowa ladabi da biyayya ga Allah. Wannan darasi ne ga kowanne musulmi.
Tarihin Annabi Iliyasu a Mahangar Musulunci
Babu wani hadisi sahihi da ke bayar da cikakken bayani a kan haihuwa ko mutuwar Annabi Iliyasu. Wasu malaman tarihin addini sun ce bai mutu ba, yana daga cikin rayayyun annabawa kamar Annabi Khidr (A.S), amma hakan bashi da cikakken dalili a cikin Qur’ani ko Hadisai sahihai.
Tarihi daga Ahlul Kitab (Mutanen Littafi)
A cikin littattafan Ahlul Kitab (Injila da Attaura), an bayyana Annabi Iliyasu a matsayin Annabi Elijah wanda aka ɗauke shi zuwa sama ba tareda ya mutu ba. Amma Musulunci bai tabbatar da hakan da cikakken bayani ba.
Kammalawa
Tarihin Annabi Iliyasu yana cike da darussa masu kyau ga dukkan musulmai. Ya kasance Annabi mai kira zuwa ga tauhidi, yana kokarin fidda mutanensa daga cikin shirka zuwa ga bautar Allah kadai. Ya sha wahala, amma bai fasa ba. Ya kasance abin koyi ga duk wanda ke son rayuwa ta gaskiya da tsoron Allah.
Allah ya sanya mu daga cikin masu bin tafarkin annabawa, ya kuma gafarta mana kurakurenmu.